पराभवाच्या राखेतून उगवलेले यश सत्यजित ने खरे करून सत्य सिध्द केले

पराभवाच्या राखेतून उगवलेले यश… सत्यजितने खरे ‘सत्य’ सिद्ध केले!

ताज रिपोर्ट घाडगे न्यूज

।शिवाजी घाडगे 

लोकशाहीच्या रणांगणात मतपेटीचा कौल अंतिम असतो. देवळाली प्रवरा नगरपरिषदेच्या निवडणुकीत काँग्रेसकडून नगराध्यक्षपदा साठी उभे राहिलेले कृष्णा नानासाहेब मुसमाडे यांना पराभव स्वीकारावा लागला हा जनतेचा निर्णय होता. पण नियतीने त्याच घरासाठी वेगळाच विजय राखून ठेवला होता. राजकीय पटलावर पराभवाची नोंद झाली; मात्र ज्ञानाच्या आकाशात त्यांच्या सुपुत्राने तेजस्वी झेप घेत कुटुंबाची आणि गावाची मान अभिमानाने उंचावली.

सत्यजित मुसमाडे यांची भारतीय अंतराळ संशोधन संस्था

 (इस्रो) मध्ये वैज्ञानिक म्हणून झालेली निवड ही केवळ वैयक्तिक यशकथा नाही; ती देवळाली प्रवराच्या इतिहासातील अभिमानाची सुवर्णरेषा आहे. नगराध्यक्षपद पाच वर्षांचे; पण वैज्ञानिक पद आयुष्यभराचे. सत्तेची खुर्ची क्षणभंगुर असते; पण ज्ञानाची उंची चिरंतन असते. म्हणूनच हा विजय केवळ एका तरुणाचा नाहीतो कर्तृत्वावर विश्वास ठेवणाऱ्या प्रत्येक घराचा आहे.

कृष्णा मुसमाडे हे डॉक्टर तनपुरे सहकारी साखर कारखान्याचे विद्यमान संचालक मितभाषी, संयमी आणि सामाजिक बांधिलकी जपणारे व्यक्तिमत्त्व. त्यांचे वडील नानासाहेब मुसमाडे यांनी शेतकरी संघटनेतून नेतृत्व करत समाजकारणाची परंपरा निर्माण केली. या घराण्याने राजकारण आणि समाजसेवा अनुभवली; पण सत्यजितने त्यात विज्ञानाची भर घालत देशसेवेचा नवा अध्याय सुरू केला.

पराभव हा शेवट नसतो; तो नव्या उमेदीचा प्रारंभ असतो. जनतेच्या दरबारात राजकीय कौल वेगळा लागला; पण शिक्षणाच्या दरबारात सत्यजितने आपली गुणवत्ता सिद्ध केली. कधी कधी मतपेटी नाकारते; परंतु गुणवत्ता आणि परिश्रम कधीच नाकारत नाहीत. “जनतेने नाकारले, पण ज्ञानाने तारले” — या वाक्यात या घटनाक्रमाचा संपूर्ण अर्थ सामावलेला आहे.

आज देवळाली प्रवरा गाव एका तरुण वैज्ञानिकाच्या यशामुळे देशाच्या अवकाश संशोधनाशी जोडले गेले आहे. इस्रोसारख्या प्रतिष्ठित संस्थेत स्थान मिळवणे म्हणजे केवळ नोकरी नव्हे, तर राष्ट्रनिर्मितीच्या प्रवासात थेट सहभाग. सत्यजितच्या अथक परिश्रमांनी आणि जिद्दीने सिद्ध केले आहे की स्वप्ने मोठी असली की गाव लहान पडत नाही.

राजकारणात पराभव झाला, पण कर्तृत्वाने विजय मिळवला. खुर्ची गेली, पण कुटुंबाची मान उंचावली. हा क्षण केवळ मुसमाडे कुटुंबाचा नाही; तो प्रत्येक पालकासाठी आश्वासक आहे की मुलांच्या शिक्षणात गुंतवलेली मेहनत आणि संस्कार कधीतरी सुवर्णफळ देतात.

आता अपेक्षा एकच सत्यजित मुसमाडे यांनी विज्ञानाच्या विश्वात नवे मानदंड निर्माण करावेत, देशासाठी महत्त्वपूर्ण संशोधन करावे आणि देवळाली प्रवराचे नाव अवकाशात झळकवावे. कारण खरे यश तेच, जे वैयक्तिक अभिमानासोबत समाजालाही प्रेरणा देते.