श्रध्देच्या भुमीत राष्ट्र सुरक्षतेची नवी ताकत

श्रद्धेच्या भूमीत राष्ट्रसुरक्षेची नवी ताकद

संवाद । शिवाजी घाडगे

एकेकाळी जगाला “श्रद्धा आणि सबुरी” हा शांततेचा संदेश देणाऱ्या साईबाबांच्या शिर्डीत आता राष्ट्रसुरक्षेच्या सामर्थ्याची नवी पहाट उगवत आहे. अध्यात्म, भक्ती आणि मानवतेची ओळख असलेल्या या पावन भूमीत डिफेन्स हब उभारण्याची प्रक्रिया सुरू झाली असून, ही केवळ औद्योगिक घटना नाही तर बदलत्या भारताच्या नव्या शक्तीची घोषणा आहे.

आजच्या जागतिक परिस्थितीत युद्धाचे स्वरूप पूर्णपणे बदलले आहे. सीमारेषेवर फक्त सैनिक उभे करून युद्ध जिंकता येत नाही; त्यासाठी आधुनिक तंत्रज्ञान, स्वदेशी शस्त्रनिर्मिती आणि संरक्षण क्षेत्रातील आत्मनिर्भरता अत्यावश्यक बनली आहे. अशा वेळी शिर्डीसारख्या धार्मिक आणि ग्रामीण भागात अत्याधुनिक तोफगोळे, रॉकेट, मिसाईल आणि ड्रोन निर्मितीचा प्रकल्प उभा राहणे ही महाराष्ट्रासाठी अभिमानाची बाब आहे.

देशाचे संरक्षणमंत्री राजनाथसिंह  यांच्या हस्ते या प्रकल्पाचे उद्घाटन होणे, हेही या उपक्रमाचे राष्ट्रीय महत्त्व अधोरेखित करणारे आहे. एकेकाळी केवळ भक्तीचे केंद्र म्हणून ओळखल्या जाणाऱ्या शिर्डीची आता संरक्षण उत्पादन क्षेत्रातही ओळख निर्माण होत आहे. हा बदल केवळ आर्थिक नाही, तर मानसिक आणि सामाजिक परिवर्तनाचाही संकेत आहे.

या प्रकल्पामुळे स्थानिक युवकांसाठी रोजगाराच्या संधी निर्माण होतील, तांत्रिक शिक्षणाला चालना मिळेल आणि परिसरातील उद्योगव्यवस्थेला नवे आयाम प्राप्त होतील. ग्रामीण भागातील तरुण आता फक्त नोकरी शोधणारे न राहता आधुनिक संरक्षण तंत्रज्ञानाशी जोडलेले कुशल मनुष्यबळ बनू शकतात. हीच खरी नवभारताची ताकद आहे.

मात्र, या विकासासोबत काही जबाबदाऱ्याही येतात. संरक्षण क्षेत्राशी संबंधित प्रकल्पांमध्ये सुरक्षेचे अत्यंत कडक निकष, पर्यावरणीय संतुलन आणि स्थानिक नागरिकांचा विश्वास जपणे आवश्यक असते. औद्योगिक प्रगतीच्या नावाखाली परिसरातील शांतता, पर्यावरण किंवा शेतीचे नुकसान होणार नाही, याची दक्षता प्रशासन आणि उद्योग व्यवस्थापनाने घ्यायला हवी.

शिर्डीची ओळख आजही श्रद्धेने नतमस्तक होणाऱ्या लाखो भक्तांमुळे आहे. त्या भूमीत आता राष्ट्ररक्षणाची नवी शक्ती उभी राहत आहे, ही काळाची मोठी गरज आहे. अध्यात्म आणि सामर्थ्य यांचा संगम जर योग्य दिशेने घडला, तर शिर्डी केवळ भक्तीचे नव्हे तर आत्मनिर्भर आणि सक्षम भारताचेही प्रेरणास्थान ठरू शकते.