व्यवस्थेचा बो-या की तरुणांचा असंतोषाचा उद्रेक

 व्यवस्थेचा बो-या की तरुणांच्या असंतोषाचा उद्रेक?

घाडगे न्यूज।प्रतिनिधी 

राहुरीतील मुख्यमंत्री देवेंद्र फडणवीस यांच्या सभेत घडलेली लघुलेखन विद्यार्थिनींची बॅनरबाजी ही केवळ एक ‘घटना’ म्हणून पाहून चालणार नाही. ती दोन गंभीर बाबी अधोरेखित करते एक म्हणजे प्रशासनाच्या सुरक्षा व्यवस्थेतील त्रुटी, आणि दुसरी म्हणजे तरुणांमध्ये वाढत चाललेला असंतोष.

प्रथम, एवढ्या मोठ्या आणि उच्चस्तरीय सभेत आंदोलक सहजपणे प्रवेश करून बॅनर फडकवू शकतात, हे निश्चितच चिंताजनक आहे. कोणत्याही मुख्यमंत्र्यांच्या कार्यक्रमात सुरक्षा ही सर्वोच्च प्राधान्याची बाब असते. मात्र राहुरीतील घटनेने स्थानिक पोलीस प्रशासनाच्या नियोजनावर प्रश्नचिन्ह उभे केले आहे. ही त्रुटी केवळ दुर्लक्ष म्हणून सोडून देता येणार नाही; कारण अशा घटनांचे परिणाम गंभीर असू शकतात.

दुसरीकडे, लघुलेखन  क्षेत्राशी संबंधित पदे संपुष्टात आणल्याच्या निर्णयामुळे विद्यार्थिनींमध्ये निर्माण झालेला रोषही तितकाच महत्त्वाचा आहे. या तरुणींची कृती पद्धत वादग्रस्त असू शकते, पण त्यांच्या प्रश्नांकडे दुर्लक्ष करता येणार नाही. शिक्षण घेऊनही रोजगाराच्या संधी कमी होत असल्याची भावना तरुणांमध्ये तीव्र होत चालली आहे. ही केवळ एका गटाची समस्या नसून व्यापक स्वरूपाची सामाजिक चिंता आहे.

मुख्यमंत्री देवेंद्र फडणवीस यांनी आंदोलनाची दखल घेऊन सकारात्मक भूमिका दर्शवली, हे स्वागतार्ह आहे. मात्र आश्वासनांपलीकडे ठोस निर्णय घेणे अधिक गरजेचे ठरेल. अन्यथा अशा असंतोषाचे स्वरूप भविष्यात अधिक तीव्र होऊ शकते.

या घटनेतून प्रशासन आणि शासन या दोघांनीही धडा घेण्याची गरज आहे. सुरक्षा व्यवस्थेची काटेकोर अंमलबजावणी आणि तरुणांच्या रोजगारविषयक अपेक्षांना न्याय देणारी धोरणे या दोन्ही बाबी तितक्याच महत्त्वाच्या आहेत. अन्यथा, अशा बॅनरबाजीच्या घटना पुढे आणखी मोठ्या असंतोषाचे रूप धारण करू शकतात.

  काही काळ गोंधळाचे वातावरण निर्माण झाले. अत्यंत नियोजनबद्ध पद्धतीने आणि काहीसे ‘गनिमी काव्या’च्या शैलीत आंदोलक सभास्थळी प्रवेश करण्यात यशस्वी झाल्याचे दिसून आले. त्यांनी बॅनर फडकावत घोषणाबाजी केली, ज्यामुळे उपस्थितांमध्ये एकच खळबळ उडाली आणि प्रशासनाची चांगलीच तारांबळ उडाली.

 सुरक्षा यंत्रणांना परिस्थिती नियंत्रणात आणण्यासाठी धावपळ करावी लागली. विशेष म्हणजे, एवढ्या मोठ्या सभेत आंदोलक सहजपणे प्रवेश करू शकले, यामुळे स्थानिक पोलीस प्रशासनाच्या कार्यपद्धतीवर प्रश्नचिन्ह उपस्थित झाले आहे.

तथापि, या घटनेमुळे स्थानिक पोलीस यंत्रणेच्या ढिसाळ नियोजनाचा अनुभव खुद्द राज्याच्या गृहमंत्र्यांनाच आल्याची चर्चा परिसरात रंगली आहे.

तर दुसरीकडे दिवंगत आमदारांच्या मुलाला आमदारकीची उमेदवारी देवुन अनुकप भरला जातोय तर होतकरु तरुणांच्या लघुलेखन पद मृत घोषित केले जात असल्याने उद्रेक पहायला मिळत आहे .