मुळात ८५ टक्के पाणी

मुळा धरणात ८५ टक्के पाणी शेतकऱ्यांत समाधानाचे वातावरण

घाडगे न्यूज।प्रतिनिधी 

अहिल्यानगर जिल्ह्याची जलसंजीवनी म्हणून ओळखल्या जाणाऱ्या राहुरी तालुक्यातील मुळा धरणातील पाणीसाठा गुरुवारी सायंकाळपर्यंत २२,०१८ दशलक्ष घनफूट (एमसीएफटी) इतका झाला असून, तो धरणाच्या एकूण क्षमतेच्या ८५ टक्के आहे. त्यामुळे जिल्ह्यातील शेतकरी, नागरिक आणि औद्योगिक क्षेत्राला मोठा दिलासा मिळाला आहे.

सध्या कोतूळ परिसरातून मुळा धरणाकडे ५,६३८ क्युसेक वेगाने नवीन पाण्याची आवक सुरू असून, पावसाचा जोर कायम राहिल्यास धरण लवकरच पूर्ण क्षमतेने भरण्याची शक्यता आहे. मुळा धरणाची एकूण पाणी साठवण क्षमता २६ हजार दशलक्ष घनफूट असून, पूर्ण क्षमतेपर्यंत पोहोचण्यासाठी आता केवळ १५ टक्के पाण्याची आवश्यकता आहे.

यंदाच्या समाधानकारक पावसामुळे धरणातील पाणीसाठ्यात सातत्याने वाढ होत आहे. त्यामुळे परिसरातील शेतकऱ्यांमध्ये आनंदाचे वातावरण निर्माण झाले आहे. मुळा धरणातील पाणी पिण्याच्या पाण्याच्या पुरवठ्यासाठी, शेती सिंचनासाठी तसेच औद्योगिक वापरासाठी अत्यंत महत्त्वाचे मानले जाते. धरणातील वाढता साठा लक्षात घेता आगामी रब्बी हंगामासाठीही पाण्याची उपलब्धता चांगली राहण्याची अपेक्षा व्यक्त केली जात आहे.

दरम्यान, धरणाच्या पाणलोट क्षेत्रात सुरू असलेल्या पावसामुळे पाण्याची आवक कायम आहे. त्यामुळे धरणाच्या पाणीपातळीत आणखी वाढ होण्याची शक्यता असून, संबंधित यंत्रणांकडून धरणाच्या स्थितीवर सातत्याने लक्ष ठेवण्यात येत आहे. धरण पूर्ण क्षमतेने भरल्यास जिल्ह्यातील पिण्याच्या पाण्याबरोबरच सिंचन व्यवस्थेलाही मोठा आधार मिळणार आहे.