डिजिटल क्रांती मुळे आम आदमी झाला पत्रकार

डिजिटल माध्यम क्रांतीमुळे ‘आम आदमी’ झाला पत्रकार

घाडगे न्यूज | प्रतिनिधी

श्रीरामपूर येथे आचार्य बाळशास्त्री जांभेकर यांच्या जयंतीनिमित्त आयोजित एकदिवसीय पत्रकार कार्यशाळा उत्साहात संपन्न झाली. डिजिटल माध्यमांच्या वाढत्या प्रभावामुळे आज सर्वसामान्य नागरिकही आपले म्हणणे थेट माध्यमांपर्यंत पोहोचवत असून ‘आम आदमी’ स्वतःच बातमीदार बनत आहे. मात्र या बदलाकडे आव्हान म्हणून न पाहता त्यात संधी शोधून पत्रकारांनी समाजातील प्रश्नांना अधिक प्रभावीपणे वाचा फोडावी, असे मत मान्यवरांनी व्यक्त केले.

कार्यशाळेला दैनिक लोकमतचे निवासी संपादक सुधीर लंके, सार्वमतचे संपादक अनंत पाटील, श्रीरामपूर पत्रकार संघाचे अध्यक्ष अशोक गाडेकर, राज्य अधिस्वीकृती समिती सदस्य प्रकाश कुलथे तसेच करण नवले, अनिल पांडे, महेश माळवे, राजेंद्र बोरसे, विकास अंत्रे, शिवाजी पवार, रवी भागवत आदी पत्रकार उपस्थित होते.

कार्यक्रमाच्या प्रारंभी उपस्थितांचे स्वागत शिवाजी पवार यांनी केले. विकास अंत्रे यांनी मान्यवरांचा परिचय करून दिला, तर प्रास्ताविक अशोक गाडेकर यांनी केले.

डिजिटल युगातील पत्रकारितेची नवी वाटचाल

संपादक सुधीर लंके यांनी मार्गदर्शन करताना सांगितले की, कोविडनंतर संपूर्ण जगासमोर नवी आव्हाने उभी राहिली. माध्यम क्षेत्र त्याला अपवाद नाही. ग्रामीण आणि शहरी भागात भेद असला तरी प्रत्येकाच्या हातात मोबाईल आल्याने सर्वसामान्य नागरिक डिजिटल पत्रकार बनला आहे. तो आपल्या परिसरातील घडामोडींना शब्दबद्ध करून सामाजिक माध्यमांद्वारे प्रसारित करतो.

या बदलामुळे पारंपरिक पत्रकारितेसमोर स्पर्धा निर्माण झाली असली, तरी हीच स्पर्धा गुणवत्ता वाढविण्याची संधी आहे. जनतेच्या वेदना, समस्या आणि स्थानिक प्रश्न अधिक संवेदनशीलतेने मांडणे हीच खरी पत्रकारितेची ओळख असल्याचे त्यांनी स्पष्ट केले.

‘डिजिटल साधने : संधी आणि आव्हाने’

संपादक अनंत पाटील यांनी “डिजिटल साधनांचा वापर – संधी व आव्हाने” या विषयावर सखोल मार्गदर्शन केले. त्यांनी सांगितले की, कोविडनंतर गावोगावी डिजिटल पत्रकारितेचे युग सुरू झाले आहे. अनेक नागरिक आपल्या गावातील प्रश्नांचे वृत्तांकन सोशल मीडियाद्वारे करत आहेत.

वृत्तपत्रातील प्रतिनिधींनीही आधुनिक तंत्रज्ञान आत्मसात करणे ही काळाची गरज आहे. केवळ पदवी मिळवून पत्रकार होता येत नाही; तर ज्याच्या लेखणीत समाजभान आणि विषयांची जाणीव आहे, तोच खरा पत्रकार ठरतो. डिजिटल क्रांती येत्या काळात अधिक वेगाने विस्तारेल, त्यामुळे पारंपरिक पत्रकारितेला तंत्रज्ञानाशी मैत्री करणे अपरिहार्य आहे, असे त्यांनी नमूद केले.

पत्रकारितेचे बदलते स्वरूप

कार्यशाळेत उपस्थित पत्रकारांनी डिजिटल युगातील विश्वासार्हता, वेग आणि जबाबदारी यांवर चर्चा केली. सोशल मीडियावरील अपप्रचार, अपूर्ण माहिती आणि तथ्य पडताळणीची गरज यावरही मतप्रदर्शन झाले.

एकूणच, पत्रकारितेच्या बदलत्या प्रवाहात गुणवत्ता, प्रामाणिकपणा आणि समाजहित जपणे हेच खरे ध्येय असावे, असा निष्कर्ष कार्यशाळेतून पुढे आला.

कार्यक्रमाची सांगता आभार प्रदर्शनाने झाली.