रात्रीच्या ड्रोनची दहशत व प्रशासनाची कसोटी?

ड्रोनची दहशत आणि प्रशासनाची कसोटी?

ड्रोन ।शिवाजी घाडगे 

राहुरी परिसरात रात्रीच्या वेळी आकाशात घिरट्या घालणाऱ्या संशयित ड्रोनमुळे नागरिकांमध्ये भीतीचे वातावरण निर्माण झाले आहे. गेल्या काही दिवसांत वाढलेल्या चोरीच्या घटनांमुळे आधीच अस्वस्थ असलेल्या नागरिकांच्या चिंतेत या ड्रोनच्या वावरामुळे अधिक भर पडली आहे. ग्रामीण भागात रात्री अपरात्री आकाशात फिरणारे ड्रोन नेमके कोणाचे, कोणत्या उद्देशाने उडवले जात आहेत आणि त्यामागे काही गैरप्रकार तर नाहीत ना, असे अनेक प्रश्न सामान्य नागरिकांना पडले आहेत.

तंत्रज्ञान हे विकासाचे साधन असले तरी त्याचा गैरवापर होऊ लागला तर तेच तंत्रज्ञान समाजासाठी धोकादायक ठरू शकते. ड्रोनचा वापर शेती, छायाचित्रण, सर्वेक्षण, आपत्ती व्यवस्थापन अशा अनेक सकारात्मक कामांसाठी होत असला तरी त्याचा बेकायदेशीर वापर रोखणे ही प्रशासनाची मोठी जबाबदारी आहे. विशेषतः ग्रामीण भागात नागरिकांना कोणताही पूर्वानुभव नसताना रात्रीच्या अंधारात ड्रोन फिरताना दिसल्यास भीती निर्माण होणे स्वाभाविक आहे.

राहुरी परिसरातील काही भागांत चोरीच्या घटनांपूर्वी ड्रोन दिसल्याच्या चर्चा सुरू आहेत. या चर्चांमध्ये किती तथ्य आहे, याचा तपास होणे आवश्यक आहे. मात्र, नागरिकांच्या मनात निर्माण झालेली असुरक्षिततेची भावना दुर्लक्षित करून चालणार नाही. प्रशासनाने या विषयाकडे गांभीर्याने पाहत अँटी-ड्रोन गनच्या माध्यमातून कारवाईचे आदेश दिले आहेत, ही सकारात्मक बाब मानावी लागेल. परंतु केवळ आदेश देऊन प्रश्न सुटणार नाही; प्रत्यक्षात अवैध ड्रोनचा शोध घेऊन दोषींवर कठोर कारवाई होणे अधिक महत्त्वाचे आहे.

आज ग्रामीण भागात कायदा व सुव्यवस्थेचे नवीन आव्हान निर्माण होत आहे. पारंपरिक गुन्ह्यांसोबत आता तंत्रज्ञानाचा वापर करून होणाऱ्या संभाव्य गैरप्रकारांनाही सामोरे जावे लागणार आहे. त्यामुळे पोलीस यंत्रणेला अधिक सक्षम, तांत्रिकदृष्ट्या प्रशिक्षित आणि सतर्क राहावे लागेल. गावपातळीवर देखील जनजागृती होणे गरजेचे आहे. कोणताही संशयास्पद प्रकार दिसल्यास अफवा पसरविण्याऐवजी तात्काळ पोलिसांना माहिती देणे, ही नागरिकांची जबाबदारी आहे.

काही ठिकाणी तरुणांनी सामूहिक गस्त घालण्याची तयारी दर्शविली आहे. नागरिकांचा सहभाग निश्चितच महत्त्वाचा असला तरी कायदा हातात घेण्याचे प्रकार टाळले गेले पाहिजेत. अन्यथा भीतीचे वातावरण अधिक गडद होण्याची शक्यता नाकारता येणार नाही.

ड्रोनचा प्रश्न हा केवळ राहुरीपुरता मर्यादित नाही; भविष्यात ग्रामीण आणि शहरी भागात अशा प्रकारच्या घटना वाढण्याची शक्यता आहे. त्यामुळे प्रशासनाने आतापासूनच स्पष्ट नियम, प्रभावी नियंत्रण आणि तातडीची कारवाई यावर भर देणे आवश्यक आहे. नागरिकांना सुरक्षिततेची खात्री देणे हेच सध्या प्रशासनासमोरील सर्वात मोठे आव्हान ठरत आहे.

दरम्यान या गंभीर प्रश्नाकडे लक्ष वेधन्या साठी 

राहुरी परिसरात सध्या  बेकायदेशीर ड्रोन रात्री घिरट्या घालत असुन हे ड्रोन नेमके कोणाचे आहेत हे ड्रोन जर बेकायदेशीर असतील तर याच्यावर कारवाई करावी या मागणी साठी देवळाली प्रवराचे नगराध्यक्ष सत्यजित कदम, आंतरराष्ट्रीय खेळाडू आप्पासाहेब ढूस व पत्रकार शिवाजी घाडगे यांनी अहिल्यानगर जिल्हाधिकारी डॉ.पंकज आशिया तसेच जिल्हा पोलीस अधीक्षक मुक्काम सुदर्शन यांची सभक्ष भेट घेऊन सविस्तर चर्चा केली 

जिल्हाधिकाऱ्यांकडून यांची दखल घेत त्वरित अ‍ॅन्टी ड्रोन च्या साह्याने याला रोखन्या साठी त्वरित प्रशासकीय आदेश दिले