शाब्बास शहाबाज शाब्बास...

शाब्बास शहाबाज... शाब्बास!

राजरंग।शिवाजी घाडगे 

अहिल्यानगर स्थानिक स्वराज्य संस्था विधान परिषद निवडणुकीत प्राजक्त तनपुरे यांची बिनविरोध निवड झाली आणि महायुतीने सुटकेचा निःश्वास सोडला. मात्र या बिनविरोध निवडीमागील पडद्यामागच्या घडामोडी पाहिल्या तर अनेक राजकीय धागेदोरे उलगडताना दिसतात. विशेष म्हणजे या संपूर्ण प्रक्रियेत चर्चेत आलेले नाव म्हणजे एमआयएमचे नगरसेवक शहाबाज सय्यद.

विधान परिषद निवडणुकीतील सर्व गणिते जुळून आली आहेत, असे वाटत असतानाच दत्तात्रय पानसरे यांनी आपण उमेदवारी अर्ज मागे घेतलेला नसल्याचा दावा करून प्रशासन आणि राजकीय नेत्यांची धावपळ उडवली. तब्बल सहा तास जिल्हाधिकारी कार्यालयात निर्माण झालेल्या या पेचामुळे बिनविरोध निवडीवर प्रश्नचिन्ह उभे राहिले. अखेर आमदार संग्राम जगताप यांनी मध्यस्थी करत हा तिढा सोडवला आणि पानसरे यांनी माघार घेतल्याची घोषणा केली. त्यानंतरच प्राजक्त तनपुरे यांच्या बिनविरोध निवडीचा मार्ग प्रशस्त झाला.

राजकारणात अंकगणित जितके महत्त्वाचे असते तितकेच संवादाचे राजकारणही महत्त्वाचे असते. पानसरे यांच्यापर्यंत पोहोचण्यासाठी आणि संवादाची दारे खुली ठेवण्यासाठी शहाबाज सय्यद यांची भूमिका महत्त्वाची ठरल्याची चर्चा आता उघडपणे होत आहे. विरोधी विचारसरणीच्या राजकारणातही संवादाचे पूल बांधणारे चेहरे कधी कधी निर्णायक ठरतात, याचे हे उदाहरण म्हणावे लागेल.

करण ससाणे यांनी उमेदवारी अर्ज मागे घेतल्यानंतर तनपुरे यांचा मार्ग जवळपास मोकळा झाला होता. मात्र शेवटच्या टप्प्यात निर्माण झालेला पेच जर सुटला नसता, तर निवडणूक बिनविरोध होण्याऐवजी मतदानाची वेळ आली असती. त्यामुळे या निवडणुकीत विजयाचे श्रेय फक्त एका पक्षाला किंवा एका नेत्याला देता येणार नाही. पडद्यामागे अनेकांनी भूमिका बजावली आहे.

राहुरी आणि नगर जिल्ह्याचे राजकारण नेहमीच नाट्यमय घडामोडींनी भरलेले राहिले आहे. १९९८ च्या पोटनिवडणुकीपासून ते आजपर्यंत अनेक प्रसंगांनी हे सिद्ध केले आहे की, येथे शेवटचा क्षण येईपर्यंत कोणताही निकाल निश्चित मानता येत नाही. यावेळीही तसेच झाले. सर्व काही सुरळीत असल्याचे वाटत असतानाच एक स्वाक्षरी आणि एक दावा संपूर्ण राजकीय समीकरण बदलू शकत होता.

प्राजक्त तनपुरे यांची बिनविरोध निवड ही निश्चितच त्यांच्यासाठी राजकीय प्रतिष्ठेची बाब आहे. मात्र या प्रक्रियेतून एक वेगळा संदेशही समोर आला. तो म्हणजे राजकारणात संवादाचे दरवाजे उघडे ठेवणाऱ्यांची किंमत कधीच कमी होत नाही.

आज तनपुरे आमदार झाले, महायुतीने विजयाचा जल्लोष केला, कार्यकर्त्यांनी गुलाल उधळला. पण या बिनविरोध निवडीच्या कथेत पडद्यामागील पात्रांचीही नोंद घ्यावी लागेल. कारण अनेकदा इतिहास विजेत्यांची नावे लक्षात ठेवतो; परंतु विजयाचा मार्ग मोकळा करणाऱ्यांची नोंद राजकीय जाणकार विसरत नाहीत.

म्हणूनच या संपूर्ण घडामोडीकडे पाहताना एकच वाक्य सहजपणे ओठांवर येते—

"शाब्बास शहाबाज... शाब्बास!"