तांभेरे बिबट्या मृत
घाडगे न्यूज।प्रतिनिधी
तांभेरे गावातील साहेबराव मुसमाडे यांच्या घासाच्या शेतात शुक्रवारी सकाळी एक बिबट्या मृत अवस्थेत आढळून आल्याने परिसरात खळबळ उडाली. या घटनेमुळे ग्रामस्थांमध्ये भीतीचे वातावरण निर्माण झाले आहे.
मृत बिबट्याच्या डोळ्याजवळ जखमा आढळल्याने त्याची इतर एखाद्या वन्य प्राण्याशी झुंज झाली असावी, असा प्राथमिक अंदाज व्यक्त केला जात आहे. संबंधित शेत परिसरात घास, मका, डाळींब व ऊस यांसारखी गारवा देणारी पिके मोठ्या प्रमाणात असल्यामुळे येथे पाणी व आच्छादन उपलब्ध होते. त्यामुळे भक्ष्याच्या शोधात बिबट्यांसह इतर वन्य प्राण्यांची वर्दळ वाढल्याचे स्थानिकांनी सांगितले.
गेल्या काही काळात बिबट्या व इतर वन्य प्राण्यांच्या हालचालींबाबत ग्रामस्थांकडून वारंवार तक्रारी करण्यात आल्या होत्या. दरम्यान, साहेबराव मुसमाडे, नंदकुमार दिघे, बंडू मुसमाडे व अशोक पवार यांनी या घटनेची माहिती तात्काळ वन विभागाला दिली.
वन विभागाच्या अधिकाऱ्यांकडून पंचनामा करून बिबट्याचे शवविच्छेदन करण्यात येणार असून, त्यानंतर नियमानुसार त्यावर अंत्यसंस्कार केले जाणार आहेत.
डोंगराळ भागात पाणी व गारवा कमी झाल्यामुळे बिबट्यांचा वावर आता मानवी वस्तीकडे वाढत असल्याचे चित्र आहे. या पार्श्वभूमीवर ग्रामस्थांमध्ये भीतीचे वातावरण असून, वन विभागाने बिबट्यांच्या हालचाली असलेल्या ठिकाणी तातडीने पिंजरे लावावेत, अशी मागणी स्थानिकांकडून करण्यात येत आहे.
Comments
Post a Comment