नगराध्यक्ष करण ससाणे यांनी उमेदवादी नामनिर्देशनपत्र दाखल

नगराध्यक्ष करण ससाणे यांना अहिल्यानगर विधान परिषदचे उमेदवारी 

श्रीरामपूर नगरपालिकेचे नगराध्यक्ष करण ससाणे यांनी अहिल्यानगर स्थानिक स्वराज्य संस्था मतदारसंघातून विधान परिषद निवडणुकीसाठी आपले नामनिर्देशनपत्र दाखल केले आहे. या घडामोडीमुळे जिल्ह्याच्या राजकारणात मोठी उत्सुकता निर्माण झाली असून आगामी निवडणुकीत महायुती आणि महाविकास आघाडीमध्ये थेट सामना रंगण्याची शक्यता व्यक्त केली जात आहे.

विशेष म्हणजे महाविकास आघाडीतील जागावाटपात अहिल्यानगरची जागा काँग्रेसच्या वाट्याला गेली आहे. त्यामुळे या मतदारसंघातून काँग्रेसकडून करण ससाणे यांनाच अधिकृत उमेदवारी मिळण्याची दाट शक्यता वर्तवली जात आहे. स्थानिक स्वराज्य संस्थांमध्ये असलेला त्यांचा संपर्क, नगराध्यक्ष म्हणून केलेले काम आणि काँग्रेसमधील वाढता प्रभाव यामुळे त्यांचे नाव आघाडीवर मानले जात आहे.

दरम्यान, महायुतीकडून माजी मंत्री प्राजक्त तनपुरे यांचे नाव चर्चेत आले आहे. तनपुरे हे लवकरच भाजपमध्ये प्रवेश करणार असल्याची जोरदार चर्चा राजकीय वर्तुळात सुरू असून, शनिवारी मुंबई येथे त्यांचा भाजप प्रवेश होण्याची शक्यता व्यक्त केली जात आहे. भाजपकडून त्यांनाच उमेदवारी दिली जाऊ शकते, अशी माहिती सूत्रांकडून मिळत आहे.

जर प्राजक्त तनपुरे यांना भाजपची उमेदवारी मिळाली आणि काँग्रेसकडून करण ससाणे यांची उमेदवारी निश्चित झाली, तर अहिल्यानगर स्थानिक स्वराज्य संस्था मतदारसंघातील निवडणूक अत्यंत प्रतिष्ठेची आणि चुरशीची होणार असल्याचे स्पष्ट संकेत मिळत आहेत. जिल्ह्यातील बदलत्या राजकीय समीकरणांमुळे या निवडणुकीकडे संपूर्ण राज्याचे लक्ष लागले आहे.